أول واجب فى حياتى البلوجرية

ده اول واجب فى حياتى البلوجرية

اولا بشكر أختى العزيزة الغالية رارا على تمريرها لى هذا الواجب.

الواجب عبارة عن سؤالين :السؤال الاول

أذكر 16 صفة عن نفسك ؟

والسؤال الثانى مرر الواجب لمن أحب؟

طبعا وقبل كل شىء بعتذر عن التأخير فى تنزيل بوستات جديدة لأنى بجد مشغول شويتين.

ثانيا زى ما انتم عارفين إن من الصعب إن الانسان يتكلم عن نفسه بس إن شاء الله أنا هكلمكم عن 16 صفة بكل صدق.
1-بحب ربنا ورسولى صلى الله عليه وسلم وبسعى دائما لرضا الله ورسوله عنى.

2- أسعى جاهدا لنشر الخير ونشر الصلاح بين الناس .

3-أحب عائلتى جدا.

4-عصبى أوى أوى أوى لدرجة صعبة وده شىء مزعلنى من نفسى جدا.

5-حساس تجاه الغير.

6-بحب أصدقائى أوى أوى .

7-رومانسى إلى حد ما.

8- بحب وقت الشرق والغروب وبحب الليل صيفا.

9-بحب إنى أكون لوحدى بعض الوقت على الرغم من إنى إجتماعى وبتـأقلم مع الناس بسرعة.

10-بكون زعلان جدا لو إن فى حد زعلان منى ولما أزعل من حد أقل كلمة ممكن تنسينى اللى عمله فيا.

11-طيب أوى والله ياجماعة.

12-حيي(خجول أوى وبتحرج أوى).

13-أكره الخيانة والكذب والنفاق.

14-أحب إن أى حد ينصحنى لو شايفنى بعمل حاجة غلط.

15-أحب إن كل الناس تكون عايشة فى سعادة وخير.

16-أحب المرأة ذات الشخصية القوية.

ياااااه الحمد لله خلصت بجد صعب جدا إن

الإنسان يتكلم عن نفسه.

وأهدى الواجب الى

آية الشقية الشعنونة *نهر الحب *أمل *WALAA

كاميليا *APPY* PRANOIA,MAGNETIC&DRAMATIC GIRL

الصيف وعبادة الله

انا رجعت تانى بعد غياب قرب من الشهر بس الغياب ده كان غصب عنى والله وطبعا انا غبت عن التدوين بس مغبتش عن الناس اللى بحب اقرأ لهم.

يارب البوست ده يعجبكم هو اسمه الصيف وعبادة الله يمكن واحد يسأل سؤال منطقى جدا ويقول يعنى العبادة متنفعش فى الفصول التانية ولا ايه

طبعا عنده حق ومحدش يقدر يلومه على كده بس انا اكيد برده مقصدش كده واللى انا اقصده يلا نعرفه...

الصيف طل علينا بيومه الطويل الحار وليله الجميل الساحر وفترات االشروق والغروب وخاصة على الشاطىء وطبعا فى الصيف زى ما

كلنا عارفين بتكتر الخروجات والرحلات والفسح سواء مع الاهل او الاصدقاء فعلا الصيف حلو وجميل
وانا شخصيا بحب الصيف جداوخاصة وقت الشروق والغروب ...

بس ما أجمل لو قضينا الصيف بكل ما فيه من الرحلات والخروجات زى ما قلنا من غير ما نعصى ربنا سبحانه وتعالى .


طبعا ممكن يكون البعض مستغرب من الكلام هعمل كل ده من غير معاصى يعنى اخرج

اتمشى باليل مع صحابى والمناظر بتاع البنات المتبرجات واللبس الفظيع من غير ما انظر نظرة كده ولا كده ايوه تقدر تعمل كل ده .


اولا مش عايزين نكون فريسه سهلة للشيطان وزى ما كلنا عارفين ان الشيطان بيكون اسهل وصولا لينا فى الصيف عن اى وقت اخر ده

طبعا لان احنا بنبقى فى فترة الدراسه مضغوطين شويه سواء ضغط نفسى لطلبة الثانوية العامة او ضغط محاضرات وسكاشن لطلبة الجامعة .

وكمان بنبقى منتظرين الاجازة للانطلاق والخروج من هذا الضغط للفسح والرحلات سواء مع الاهل او الاصدقاء

فينتهز الشيطان هذه لفرصة ويدخل لكل واحد فينا نقطة الضعف اللى عنده واللى هو عارفها ودرسها كويس جدا.

فى واحد يحب يسمع اغانى ليل نهار وواحد تانى يحب يبص على الرايح والجاى وواحد ثالث يحب يعاكس فى البنات وواحد وواحد وواحد ...كتييييييييييييييير .




وزى ما كلنا عارفين ان المصيف مكان شهوات وملذات واظن ان الشياطين نايمه هناك

اليومين دول فإيه رأيكم لو نقضى المصيف من غيرمعاصى اكيد بعض الناس مستغربة وهى بتقرأ الكلام ده وتقول

ازاى اروح المصيف وارجع من غير معاصى وانت بتقول ان هو مكان شهوات وملذات ومبيت شياطين طبعا ده سهل ان شاء الله ...ازاى...

اولا كلنا عارفين الايه اللى بتقول قال تعالى (ان كيد الشيطان كان ضعيفا)


يعنى بفضل الله اولا وآخرا نقدر عليه فياريت نضيع عليه الفرصة ومنخليهوش يقدر علينا ازاى...



المطلوب من كل واحد طالع رحلة مصيف .....


اولا يجدد نيته لله انه خارج يصيف من غير معاصى ودى اول حاجة .

تانى حاجة يحافظ على صلاته هناك اوعى تسيب الصلاة.

تالت حاجة يغض بصره.

رابع حاجة يحاول يقرأ ورد معين من القرأن يخصصه لنفسه ومعاه ورد استغفار.

طبعا ممكن واحد يقول انا طالع اصيف يومين وراجع تانى وهابقى اصلى واقرأ القرآن واقول الاستغفار وساعة لربك وساعة لقلبك ياعم

الشيخ ده هو اللى بيقال بس اوعى ياللى بتقول كده تزعل منى.... انت غلطان.

صدقنى كل الحاجات اللى انا ذكرتها دى مش هتاثر عليك فى حاجة بالسلب ولاعلى الفرحة بتعتك بل بالعكس دى كلها ايجابيات ليك هتخليك

سعيد جدا فى رحلتك والرحلة هتبقى جميلة وممتعة واحذر الشيطان وهو بيقولك كبر ياعم انت جاى تصيف ولا جاى تكبت نفسك لان

الشيطان بيوصل لبعض الناس اللى بيوسوس لهم ويضحك عليهم ان عبادة ربنا سبحانه وتعالى كبت للنفس والهبل دول بيصدقوه لانهم

مجربوش يعبدوا ربنا عشان يعرفوا ان العبادة فيها راحة للنفس وسعادة وصفاء فانا عايزك تضحك عليه انت وصدقنى زى ما قلتلك قبل كده

ان هو ضعيف وهقولك الايه الكريمه كمان مرة قال تعالى (ان كيد الشيطان كدان ضعيقا) .

وصدقنى هتبقى اجمل رحلة هتقضيها فى حياتك عارف انت المقولة اللى بتقول إسأل مجرب ومتسألش دكتور انا بقولك كده ليه لانى انا

جربت الرحلة بالشكل اللى بقولك عليه ده وكانت والله رحلة جميلة ومن اجمل الرحلات

اللى انا طلعتها لانى كنت بأدى كل اللى عليا تجاه ربنا عزوجل وكمان كنت طبعا بنزل البحر وبخرج اتمشى باليل وكنت

بعمل كل اللى فى نفسى فى غير معصية الله سبحانه وتعالى .

وانت كمان ممكن تعمل كده وهتقضى كل الاوقات الحلوة مع صحابك بس الفرق انك عبدت ربنا هناك.

فياريت كلنا واحنا طالعين المصيف تبقى دى نيتنا وهتبقى ان شاء الله رحلة جميلة.


فى كام سؤال عايز اعرف اجاباتكم عليها فى التعليقات ...


لان ممكن يكون كلامى غلط لانى رأيى صواب يحتمل الخطأ ورأى غير خطأ يحتمل الصواب.

هل من الممكن ان احنا نخرج بالليل نتمشى من غير ما نعصى ربنا ولا مش ممكن ؟


هل من الممكن ان احنا نسهر مع بعض عند واحد من اصحابنا مثلا من غير ما نعصى ربنا ولا مش ممكن؟


هل من الممكن ان احنا نخرج فى رحلة مع بعض نصيف من غير ما نعصى ربنا ولا مش ممكن ؟